ആധുനിക മനുഷ്യൻ ഇന്നും ആശ്ചര്യത്തോടെ നോക്കി കാണുന്ന ഒന്നാണ് ‘മമ്മികൾ’. ഒരുപക്ഷെ ഈജിപ്ത് എന്ന് കേൾക്കുമ്പോൾ ആദ്യം ഓർമ്മ വരുന്നതും ഈ മമ്മികളും പിരമിഡും തന്നെ ആയിരിക്കും പക്ഷെ ഈ മമ്മികൾക്ക് ഇംഗ്ലണ്ടിലെ വിക്ടോറിയൻസുമായി ഒരു ബന്ധമുണ്ട്.
ബ്രിട്ടീഷ് ചരിത്രത്തിലെ പ്രതാപകാലമായിരുന്ന 1820 മുതൽ 1914 വരെയുള്ള കാലയളവാണ് വിക്ടോറിയൻ കാലഘട്ടം എന്ന് പറയുന്നത്. സമൂഹത്തിൽ പണത്തിന്റെ അടിസ്ഥാനത്തിൽ വർഗ്ഗവ്യത്യാസം മനുഷ്യരെ തരം തിരിച്ചിരുന്ന കാലമായിരുന്നു അത്.
അന്ന് പണക്കാരുടെ മദ്യസൽക്കാരങ്ങൾക്കിടയിലുള്ള ഒരു പ്രധാന പരിപാടി മമ്മികൾ തുറന്ന് പരിശോധിക്കുക എന്നതായിരുന്നു. കേട്ടാൽ ഇതെന്ത് കൂത്ത് എന്ന് തോന്നുന്ന ഈ പരിപാടി അവരുടെ ഏറ്റവും വലിയ വിനോദങ്ങളിൽ ഒന്നായിരുന്നു എന്നതാണ് യാഥാർഥ്യം.
വിനോദത്തിനപ്പുറം മറ്റ് ചില കാരണങ്ങൾ കൂടി ഈ പ്രവർത്തിക്കു പിന്നിൽ ഉണ്ട്. ആ കാലഘട്ടത്തിൽ മരിച്ചുപോയവരുടെ മനുഷ്യമാംസം പല വലിയ രോഗങ്ങങ്ങൾക്കും മരുന്നാണെന്ന് കണക്കാക്കിയിരുന്നു. അതുകൊണ്ട് തന്നെ മമ്മികൾക്ക് അസുഖം ഭേദമാക്കാൻ കഴിയുമെന്ന വിശ്വാസം അവർക്ക് ഉണ്ടായിരുന്നു.
ഈജിപ്റ്റുകാർ മമ്മികളാക്കിയിരുന്ന ശരീരങ്ങളിൽ നിന്നുണ്ടാക്കുന്ന ‘മമ്മിയ’ (mummia) എന്ന പദാർത്ഥത്തിന് വലിയ ഔഷധഗുണങ്ങൾ ഉണ്ടെന്ന് അപ്പോത്തിക്കരികൾ വർഷങ്ങളോളം അവരെ വിശ്വസിപ്പിച്ചിരുന്നു. ഇതിനാൽ തന്നെ എന്ത് വില കൊടുത്തും ഈജിപ്റ്റിൽ നിന്ന് യൂറോപ്പിലേക്ക് മമ്മികൾ കൊണ്ടുവരാൻ ആളുകൾ തയാറായിരുന്നു.
19 ആം നൂറ്റാണ്ടായപ്പോഴാണ് ആളുകൾ മമ്മികൾ ഭക്ഷിക്കുന്നത് നിർത്തി മമ്മികൾ തുറന്ന് കാണുന്നതിനായി നടത്തുന്ന പ്രത്യേക പാർട്ടികൾക്ക് തുടക്കം കുറിക്കുന്നത്. സമൂഹത്തിൽ വലിയ സ്ഥാനം അലങ്കരിച്ചിരുന്നവർക്ക് മാത്രമായിരുന്നു ഇത്തരം പാർട്ടികളിലേക്ക് ക്ഷണം ലഭിച്ചിരുന്നത്.
ഇംഗ്ലണ്ടിലുള്ളവർക്ക് ഈജിപ്ത് അന്നൊരു അത്ഭുതമായിരുന്നു. ഈജിപ്തുകാരുടെ പുരാതന രീതികളും അവരുടെ നാഗരികതയും, ജീവിതശൈലികളും, മമ്മികൾക്കുള്ളിലെ രഹസ്യവും മനസ്സിലാക്കുവാനായും കൂടെയായിരുന്നു ഈ പാർട്ടികൾ നടത്തിയിരുന്നത്.
തുടക്കത്തിൽ ഇത്തരം പാർട്ടികൾക്ക് ഡോക്ടർമാരായിരുന്നു മുൻകൈ എടുത്തിരുന്നത്. ആ കാലത്തേ പ്രശസ്ത സർജനായിരുന്ന തോമസ് പെറ്റിഗ്രു. റോയൽ കോളേജ് ഓഫ് സർജൻസിൽ വച്ച് അദ്ദേഹം ഒരു മമ്മി വലിയ ആൾക്കൂട്ടത്തിന് മുന്നിൽ തുറന്നുവച്ചു.
അദ്ദേഹത്തിന്റെ കാലത്ത്, പോസ്റ്റ്‌മോർട്ടങ്ങളും ഓപ്പറേഷനുകളും പരസ്യമായി നടന്നിരുന്നു, ഈ മമ്മി തുറകളും മറ്റൊരു പൊതു മെഡിക്കൽ പരിപാടി മാത്രമായിരുന്നു.പക്ഷെ വളരെ പെട്ടന്ന് തന്നെ ഇതൊരു വിനോദപരിപാടി മാത്രമായി മാറി.
ഉണങ്ങിയ മനുഷ്യശരീരവും തലയോട്ടിയുമൊക്കെ മദ്യലഹരിയിൽ ആർപ്പുവിളിക്കുന്ന മനുഷ്യർക്ക് മുന്നിൽ നഗ്നമായി കിടന്നു. ഇത്തരം പാർട്ടികൾക്ക് മറ്റൊരു ഉദ്ദേശം കൂടിയുണ്ടായിരുന്നു മമ്മികൾക്കൊപ്പം അടക്കം ചെയ്യപ്പെട്ടിട്ടുള്ള വിലയേറിയ നിധി ശേഖരങ്ങൾ ഈ ധനികർക്ക് ലേലം വിളിച്ച് നൽകുക എന്ന സാമ്പത്തിക നേട്ടം മുന്നിൽ കണ്ടുകൊണ്ടായിരുന്നു പലരും പാർട്ടികൾ നടത്തിയിരുന്നത്.
കാലക്രമേണ, ഈ വിനോദം അവസാനിച്ചു. ചിലർക്ക് ഇതൊരു ബോറൻ പരിപാടിയായി തോന്നി, മറ്റ് ചിലർക്ക് ചരിത്രത്തിന്റെ ഭാഗമായ മമ്മികൾ ഇങ്ങനെ നശിപ്പിക്കുന്നതിനോട് കടുത്ത വിരുദ്ധമായിരുന്നു, ചിലർ ഇതൊരു നികൃഷ്ട വിനോദമാണെന്ന് തുറന്ന് പറഞ്ഞു. അങ്ങനെ 1908 ൽ ഇന്ഗ്ലണ്ടിലെ മാഞ്ചെസ്റ്ററിൽ മാർഗരറ്റ് മുറേയുടെ വീട്ടിൽ വച്ച് നടന്ന മമ്മി പാർട്ടിയോടുകൂടി ഈ ക്രൂരവിനോദം അവസാനിച്ചു.
